बिर्तामोड । केहीदिन अघि महानन्द चोकमा हत्या गरिएकी इलाम सूर्योदयकी मनिषा लोहारलाई प्रेमीले सब्जी काट्न ल्याइदिएको चक्कुले प्रहार गरेको खुलेको छ ।
भदौ २८ गते साँझ ६:४० बजे लोहारको अर्जुनधारा नगरपालिका वडा नम्बर-६ महानन्द चौकमा हत्या भएको थियो । कैलाली गौरीगंगा नगरपालिका वडा नम्बर-३ बस्ने २० वर्षीय अनिल बिकले १९ वर्षीया लोहारको चक्कु हानी हत्या गरेका थिए ।
घटना भएको समयमा स्थानीयले प्रतिकार गर्दा गम्भीर घाइते भएका बिक उपचार पश्चात डिस्चार्ज भइसकेको र प्रहरीको नियन्त्रणमा रहेको इलाका प्रहरी कार्यालय अनारमनीका प्रमुख प्रहरी नायब उपरीक्षक प्रकाश बिष्टले जानकारी दिए ।
कसरी भयो घटना ?
प्रहरीको प्रारम्भिक अनुसन्धानको क्रममा दुई वर्ष अघि सामाजिक सञ्जालमार्फत बिक र लोहारको चिनजान भएको खुलेको छ । बिस्तारै उनीहरूको चिनजान प्रेममा परिणत भएको थियो । कैलाली घर भएपनि विकको परिवार भारतमा बस्दै आएको छ । बिक सिलिगुडीमा कपडा पसलमा मार्केटिङको काम गर्दै आएका छन् । यस अघिपनि लोहार र विकको बेला बेला भेट्घाट हुँदै आएको थियो ।
छिट्टो रिसाउने र प्रतिक्रिया देखाउने विकको स्वभाव मनिषालाई मन परेको थिएन । उनको स्वभाव कै विषयमा उनीहरू बिच विवाद हुने गरेको थियो ।
घटना भएको दिन अनिल मनिषालाई भेट्न सिलिगुडीबाट आएका थिए । मनिषालाई सब्जी काट्न चक्कु समेत लिएर आएका अनिल छिटै बिर्तामोड आएकोले घुम्न गएका थिए । बिर्तामोडस्थित त्रिवेणी एचआर मेनपावरमा काम गर्दै आएकी मनिषाको छुट्टी भएपछी उनीहरू अटो चढेर मनिषाको कोठा बिर्तामोड-५ पाथीभरा टोलतर्फ लागेका थिए । अटोमा आउँदा नै उनीहरू बीच सामान्य विवाद भएको थियो । बाटोमा विवाद नगरौं कोठा मै गएर कुरा गरौं भन्ने अनिलको प्रस्तावमा मनिषाले कोठामा गएर जथाभावी बोल्ने र अरूले सुन्ने भन्दै इन्कार गरेकी थिइन् । त्यत्तिकैमा आवेगमा आएका अनिलले तरकारी काट्न  ल्याइदिएको चक्कु निकालेर मनिषामाथि अन्धधुन्ध वर्षाउँछन् । शरीरको विभिन्न भागमा चक्कु प्रहारबाट सख्त घाइते मनिषालाई बीएण्डसी अस्पताल पुर्याईएपनि उनको मृत्यु भइसकेको हुन्छ ।