काँकडभिट्टा । एकसय रुपैयाँ भन्दा बढीकाे सामानमा भन्सार लगाउने मेची भन्सार कार्यालय काँकडभिट्टाबाट ट्रकका ट्रक सामान भन्सार नतिरी बाहिरिने गरेकाे रहष्य खुलेकाे छ ।
सामान्य भान्सा चलाउन पाेकामा केही हजारकाे सामान ल्याउने सर्बसाधारणलाई चेक जाँचमा कडाई गर्न थालेकाे मेची भन्सारले ठूला ब्यापारीका ट्रकका ट्रक सामान बिना भन्सार पास गराउने गरेकाे पाइएकाे हाे ।
भन्सार प्रक्रिया पूरा नगरी भागेको भनिएकाे सामानसहितको कन्टेनर शुक्रबार प्रहरीले नियन्त्रणमा लिएपछि साे रहष्य खुलेकाे हाे ।
भन्सारमा राजश्व नतिरी निस्किएको सो कन्टेनर नियन्त्रणमा लिएको जिल्ला प्रहरी कार्यालय झापाका डीएसपी खगेन्द्रप्रसाद रिजालले जानकारी दिए ।
जिल्ला प्रहरी कार्यालय झापा र इलाका प्रहरी कार्यालय काँकडभिट्टाको संयुक्त प्रहरी टोलीले विशेष सूचनाको आधारमा पूर्व पश्चिम राजमार्ग अन्तरगत मेचीनगर ६ स्थित ट्राफिक पोस्ट नजिकैबाट शुक्रबार साँझ ७ बजे कन्टेनरलाई नियन्त्रणमा लिएको हो । भन्सारदेखि ट्राफिक पोस्टको दुरी ५०० मिटर छ ।
प्रहरीले ना २ ख ४९०२ नम्बरको कन्टेनरलाई नियन्त्रणमा लिएसँगै चालक फरार भएका थिए । 'कन्टेनर भन्सारबाट निस्किए पनि कुनै कागजात फेला परेको छैन,' डीएसपी रिजालले भने, 'अहिले कन्टेनर खोलेर सरसामान गन्ती गर्ने काम भइरहेको छ, त्यसपछि राजश्व अनुसन्धान कार्यालय इटहरी बुझाइने छ ।' कन्टेनरमा भित्र लाखौं मुल्य बराबरको काँसका विभिन्न सामान रहेको उनले बताए ।
