बिर्तामाेड । वर्षासहित आएको बाढी पहिरोका कारण पूर्वको मेची राजमार्गसहित तमोर करिडोर अवरुद्ध भएको छ ।
सडक विभागका अनुसार अन्य १८ सडक भने एकतर्फी सञ्चालन भइरहेका छन् ।
आज बिहान ९ बजेको अद्यावधिक विवरणअनुसार मेरी राजमार्ग अन्तर्गत केचना-चन्द्रगढी-चारआली, इलाम-फिदिम र गणेशचोक -ताप्लेजुङ-ओलाङचुङ्गोला सडक खण्ड अवरुद्ध छ । पाँचथरको हेवा खोलामा सडक र पुल भत्किँदा मेची राजमार्ग अवरुद्ध भएको हो ।
यसैगरी तमोर करिडोर अन्तर्गत चतरा-मुलघाट माझीटार-अमरापुरडाँडा सडक खण्ड पनि अवरुद्ध सडक विभागले जनाएको छ । यो सडक खण्डमा पर्ने पाँचथरको माझीटार र हेवा खोलामा सडकमा भएको क्षतिका कारण यातायात पूर्ण रुपमा ठप्प भएको हो ।
विभागका अनुसार सङ्खुवासभाको मुढे, हाइटार र दोभानमा पहिरो जाँदा कोशी राजमार्गसहित अन्य १८ सडक भने एकतर्फी सञ्चालन भइरहेका छन् ।
यता लगातारकाे बर्षाका कारणा तराईका बिभिन्न शहर जलमग्न भएका छन् । झापाकाे भद्रपुर नगरपालिका, गाैरादह नगरपालिका, कचनकवल, बाह्दशी, झापा, गाैरिगञ्ज गाउँपालिका जलमग्न भएका छन् । बर्षा नराेकिएकाे अवस्थामा आज बेलुकासम्ममा सम्भावित डुवान क्षेत्रबाट जाेगाउन उद्दार गर्ने तयारी गरिएकाे जिल्ला प्रशासन कार्यालय झापाले जनाएकाे छ ।
