काठमाडौं । नेपाली फुटबलको लागि चासोको एक सर्वकालीन कीर्तिमान हो १३ गोलको । नेपालले औपचारिक रूपमा सन् १९८२ देखि अन्तर्राष्ट्रिय फुटबल खेलेको मान्ने हो भने अहिलेसम्म दुई खेलाडीले समान सर्वाधिक १३ गोल गरेका छन् । यी दुई खेलाडी हुन् हरि खड्का र नीराजन रायमाझी ।
दुवै खेलाडी धेरै अर्थमा समकालीन खेलाडी रहे । हरि केही हदसम्म सिनियर हुन् । जहाँ हरिको खेलाडी जीवन अपेक्षाकृत रूपमा लामो रह्यो, त्यहीं नीराजनको खेलाडी जीवन भने त्यहीं छोटो रह्यो । नीराजन आफ्नो खेलजीवनको उत्कर्ष रहेका बेला अविश्वसनीय ढंगले विदेश पलायन भए ।
नीराजन फेरि नेपाल फर्केर राष्ट्रिय टिममा पुनरागमन पनि गरे । यस विपरीत हरिको खेल जीवनमा त्यति साह्रो उतारचढाव रहेन । हरिले सबैभन्दा पहिले १३ गोलको कीर्तिमान बनाए । यो कीर्तिमान केही समय कायम रह्यो । पछि त्यसलाई नीराजनले बराबरी गरेका थिए । त्यसपछि यो कीर्तिमान लामो समय पहुँचभन्दा बाहिर रह्यो । लागिरहेको थियो सायद यो कीर्तिमान अब कसैले छुन सक्दैनन् । त्यसलाई भंग गर्ने त परकै कुरा । तर एकाएक यो परिदृश्यमा देखापरे अञ्जन विष्ट ।
अहिले साफ च्याम्पियनसिप २०२३ चलिरहेको छ र नेपालले आफ्नो पहिलो खेल खेलिसकेको छ कुवेतविरुद्ध । त्यसमा नेपालको तर्फबाट सम्भव एक गोल अञ्जनकै नाममा रह्यो । यो रह्यो उनको १२ औं गोल । ढिलोचाँडो अञ्जनले हरि र नीराजनको कीर्तिमान भंग गर्ने पक्कापक्की जस्तै छ । हुनसक्छ, अञ्जनले यो कीर्तिमान बेंगलुरुमै हात पार्न सक्नेछन् । कम्तीमा बराबरी, होइन भने कीर्तिमान नै उछिन्ने अवसर छ ।
