बिर्तामोड । बालिका बलात्कार अभियोगमा पूर्पक्षका लागि थुनामा रहेका बिर्तामोड नगरपालिकाका पूर्व मेयर ध्रुवकुमार शिवाकोटी धरौटी रकम जम्मा गरेर रिहा भएका छन् । शिवाकोटीलाई धरौटीमा रिहा गर्न उच्च अदालत विराटनगर, इलाम इजलासले वैशाख २५ गते नै आदेश दिएको भए पनि शिवाकोटी आइतबार धरौटी जम्मा गरेर रिहा भएका हुन् ।
शिवाकोटीले २० लाख नगदै धरौटी जम्मा गरेर रिहा भएको जिल्ला अदालत झापा स्रोतले जनाएको छ । बिहीबार आदेश ढिलो आएको शुक्रबार कानुन दिवस र शनिबार सार्वजनिक विदा परेका कारण शिवाकोटी आइतबार मात्र रिहा भएका हुन् ।
आफ्नै घरमा काम गर्न राखेको बालिकालाई पटकपटक बलात्कार गरेको अभियोगमा २०८१ मङ्सिर २४ गते पक्राउ परेका शिवाकोटी स्वास्थ्यको कारण देखाउँदै पक्राउ परेकै दिनदेखि बिएण्डसी अस्पतालको क्याबिनमा बस्दै आएका थिए ।
शिवाकोटीलाई जिल्ला अदालत झापाले पूर्पक्षमा राखेर अनुसन्धान गर्नु भन्दै २०८१ पुष २२ गते आदेश दिएको थियो । जिल्ला अदालत झापाको आदेश पछि बेरितको आदेश बदर गरी पाउँ भन्दै शिवाकोटी २०८१ माघ २० गते उच्च अदालत गएका थिए । शिवाकोटीको निवेदन उपर सुनुवाई गर्दै २०८२ वैशाख २५ गते किरणकुमार पोखरेल र रेखा थापा पाण्डेको संयुक्त इजलासले २० लाख धरौटी लिएर रिहा गर्न आदेश दिएको थियो ।